VVPAT chungchanga EC-in INDIA a hmu duh lo dem

Congress chuan January 25-a National Voters Day hman denchhan a, Election Commission (EC) nena VVPAT hman dan chungchang sawipui an tum laia EC-in INDIA party-te an hmu duh lo chu an dem thu an sawi.

Eptu party ṭangrual pawl, INDIA chuan National Voters Day-ah hian inthlannaa VVPAT tam zawk hman phutin EC hi hmuh an tum a, EC hian INDIA hruaitute chu an hmu duh lo niin an tarlang. Hei hi Congress chuan democracy innghahna ngaihnepna niin an sawi.

Congress general secretary, Jairam Ramesh chuan January 25 chu kum tina National Voters Day atana hman a nih thu leh, inthlan buatsaih ṭhintu, EC-in INDIA hruaitute an hmu duh lo chu a dem thu leh, vote neitute'n vote an thlak hun atana VVPAT tam zawk hman theih tura buatsaih chu an sawipui duh mai a nih thu X-ah a tarlang. "VVPAT chu Voter-Verified Paper Audit Trail a ni a, vote thlaktuin a vote chu a thlak ang ngeia dik taka chhinchhiah a ni tih a hriatna tur mai a ni" tiin a sawi bawk.

Party president, Mallikarjun Kharge chuan National Voters Day chu mipuite thiltihtheihna lantirna ni a nih thu sawiin, an aiawh tur thlang tura duhthlanna an neih ropui ber niin a sawi bawk. Kharge chuan tunah hian democracy humhim a nih theihna tur leh, India constitution a ral mai loh nan, heng hlawhtlinna tura hmanrua kan neihte humhim a ṭulna laiah kan awm mek a ni, a ti.