J&K-ah helpawl nena inzawmna nei hriat nan census nei dawn

Jammu & Kashmir-a security force leh police-te chuan J&K-a chengte hming leh phone number lain census an nei dawn a, hemi hmang chhungkaw member zingah helpawl nena inzawmna nei an awm em tih te, ram pawn tlawh te, hmun hrang hranga property an neih dan bakah an chenna inah helpawl chetna hnu a awm em tihte leh, CCTV an nei em tihte hriat vek an tum thu an sawi.

Kar liam ta chhung khan police-te hian Srinagar-a in tinah 'census form' tih leh 'Village X Ray' tih document an sem a, Army leh Central Armed Police Force (CAPF) te pawh Kashmir valley leh Jammu division vela operation an neihna hmunah te hetianga chhungkua in tin hriatna tura ruahmanna kalpui tur hian hriattir an ni bawk.

Police-te form semah hian fill up tur chi hrang hrang a awm a, helpawl nena inzawmna neih leh neih loh te, chhungkua angin helpawl chetna an tawng tawh em tih te, chhungkaw member ram danga awm te, an in thlalak leh chhungkaw lu ber bakah chhungkaw member zawng zawng thlalak dah tel tur te, lirthei an neih chuan lirthei number bakah, Aadhar number leh mobile number te dah tel tur a ni.Mipuite chu he form hi fill up a, police station hnai bera theh lut tura hriattir an ni.

Hetianga J&K-a chengte hriatna tura form siam hi sorkar chuan inbeihna thlen palha venhimna hna thawktute tana mipuite hriat chian a awlsamna tur a nih thu sawiin, police-te'n mipuite tana hna an thawhna turah awlsamna a siam dawn niin an sawi bawk. Hemi chungchangah hian Srinagar-a cheng pakhat chuan tun hma pawhin hetiang form hi an fill up tawh thu sawiin, tun ṭumah erawh an thil hriat duh a kimchang ta deuh niin a sawi.

He hmalakna hi nikum December 21-a Jammu-a Poonch leh Rajouri area-a firfiaka chete'n sipai-te ambush-a sipai pali an thah hnua kalpui a ni. Hemi ṭuma sipai beitute hi khaw mite'n an hum niin Army lam chuan an sawi a ni.