Nitish Kumar-a'n BJP zawm dawn

Bihar chief minister Nitish Kumar chuan 2020 Bihar assembly inthlana ṭangrual pawl sorkar an siam chu chhuahsanin, Bharatiya Janata Party (BJP) thlawpnain sorkar thar a siam dawn nia sawi a ni.

Nitish Kumar hi Janata Dal (United) hruaitu leh Bihar chief minister ni lai a ni a, kum 2020 Bihar inthlanah khan Rashtriya Janata Dal leh Congress-te nen inthlan chuhhoin sorkarna an siam a ni. Tuna BJP zawma sorkar thar a siam tur hi Pathianniah lak luh a ni dawn nia sawi a ni a, Nitish Kumar hian January 28-a a hun hman dan tur ruahmanna a siam sa pawh a cancel vek niin an sawi. BJP thawhpuia sorkar thar an siam turah hian BJP MLA pahnih chu Deputy chief minister chanvo pek an ni dawn a, state assembly ding lai chu ṭhiah a nih dawn loh bakah, inthlan ṭhat pawh buatsaih a ni dawn lo a ni.

Central-a sorkar lai BJP paihthla tura eptu party ṭangrual pawl dintu zinga mi, Nitish Kumar hian Rahul Gandhi-a Bharat Jodo Nyay Yatra neih mek zawm tura sawmna chu a lo hnawl tawh a, INDIA chu a chhuahsan thu a puang zui a, BJP kaihhruai National Democratic Alliance (NDA) nen inbiakna an nei chhunzawm a ni. Hetih lai hian JD(U) leh BJP-in inbiakna an neih chu state-a JD(U) thawhpui, Congress leh RJD te chuan BJP paihthla tura JD(U) laka beiseina an la hloh loh thu an sawi thung.