Amnesty in Modi leh Yogi hnenah ngenna thlen

Global human rights body, Amnesty International chuan prime minister Na­ren­dra Modi leh Uttar Pra­desh chief minister Yogi Adityanath hnenah Varanasi-ah mipuiten boruak ṭha tak hnuaia Citizenship (Amendment) Act (CAA) duh lohna an lantir phalsak turin a ngen. 

Amnesty chuan CAA dodalna lantira nawrh huaihawttute laka police-te chetdan rawng tak thlengte chu chhui turin a ngen bawk a, heng thil thlenga mawhphurtute chu thubuai siamsak an put tih an sawi. Varanasi-a CAA dodal­tuten boruak ṭha tak hnuaia nawrh an huaihawt laiin, UP sorkar chuan heng mite hi police-te hmangin na takin a bei let a, CAA sawiseltute pawh tihbuai an ni tiin Amnesty International India (AII) executive director Avinash Kumar chuan a sawi a ni. 

Varanasi hmun hrang hranga mite an kawm kual hnuah leh, nawrh huaihawta pungkhawmte awmdan an zirchian  hnuah AII chuan PM Modi leh CM Yogi te hi  inrawlh tura ngenin, mipuite an duh loh zawng lantira pungkhawm tura dikna an neihte palzutsak an ni chu titawp turin an ngen. "PM Modi chuan sawi­selna awm ṭhin chu demo­cracy tichaktu zawk a ni tiin sawi mah se, a thusawi hi UP sorkar chuan a zawm ve lo a ni. Nawrh huaihawt an dilnate a hnawlsak a, nawrh huaihawtte chu man niin state police-ten an dim lo a, state official-te ngei pawhin ualau takin an vau a ni," tiin Kumar chuan a sawi. Buaina chawk chhuak zawng ni loa nawrh huaihawt chu thil sual ni loin, mipuite right a ni tiin PM chu a constituency chhung nawrh huaihawtte chunga chetdanah midangte entawn tura hma la turin a ti.