Bharat Jodo Nyay Yatra chhunzawm leh

Congress-in 2024 Lok Sabha inthlanpui lo awm tura an inbuatsaihna pakhat atana India ram fan chhuah an tumna, Rahul Gandhi kaihhruaia Bharat Jodo Nyay Yatra neih mek chu ni hnih an chawlh hnuah nimin khan West Bengal-ah an chhunzawm leh ṭan.

Yatra hi Manipur-a bul ṭan a ni a, January 25 khan Assam aṭangin West Bengal hi an lut a ni. Ni hnih an chawlh lailawk hnuah nimin khan Jalpaiguri district aṭangin Yatra hi chhunzawm leh ta a ni.

State Congress leader, Suvankar Sarkar chuan Yatra chu bus leh ke hmanga kalpui chhunzawm a nih tur thu leh, Siliguri bula zan an chawlh tur thu te, Bihar-a a kal leh hmain Uttar Dinajpur district-a Islampur-ah an kal tur thute a sawi . Ruahman danah chuan Yatra hian Islampur aṭanga West Bengal a chhuahsan zet hnuah January 31-ah Bihar aṭanga rawn lut lehin, Malda paltlangin, Murshidabad an kaltlang dawn a, February 1-ah West Bengal hi an chhuahsan ang.

Congress buatsaih, Bharat Jodo Nyay Yatra-in West Bengal a luh hma hian Jalpaiguri-ah Gandhi lem chuanna banner tihchhiat a nih bakah state Congress president, Adhir Ranjan Chowdhury chuan punkhawm phalna pek chungchanga harsatna an tawh thu a sawi. Hemi avang hian Congress party president, Mallikarjun Kharge chuan West Bengal chief minister, Mamata Banerjee hnenah lehkha thawnin, Yatra-in an state a paltlang chhunga tluang tak leh harsatna awm loa engkim kalpui a nih theih nana lo pui turin a ngen niin an tarlang.

Yatra hi ni 67 chhung neih tur niin, hemi chhung hian km 6,713-a thui an kal dawn a, state 15-a district 110 an paltlang ang.