PM-in Supreme Court building zauhna tur Rs. vbc 800 pawm

Prime minister Narendra Modi chuan Supreme Court building tihzauh leh a chhehvel chei ṭhatna tur atan Rs. vbc 800 pawm a nih thu sawiin, rorel dan phunga awlsamna siam chu India mipui zawng zawng chanvo a nih thu leh chumi hlawhtlinna chu Supreme Court a ni, a ti.

Supreme Court hian kumin hi an diamond jubilee kum a nih angin lawmna hun an hmang a, he hunah hian PM Modi hian thu sawiin Chief Justice of India, DY Chandrachud chu rorelna a kalpui danah chhuanawm a tih thu leh sorkar pawhin rorelna hmunhma tihchagtlun chu a ngaihpawimawh thu a sawi. Kum 2014 aṭangin Supreme Court tihchangtlun nan hian Rs. vbc 7,000 hman an nih tawh thu a sawi tel bawk.

PM Modi chuan rorelna samkhai zawk mipuite tana siam a nih theih nan technology hman a ṭul thu sawiin, rorelna leh thutlukna tawp siam tur hian mi zawng zawngin Supreme Court kan ngaichang a, hei vang hian ram chhung khawia mi pawhin he rorelna leh thutlukna hi an hriat theihnan ruahmanna siam a ṭul a ni, a ti. Supreme Court-in kum 75 a tlin kum pual hian Prime Minister hian mipuite tana ṭangkai tur, information & technology huanga Digital Supreme Court Reports (Digi SCR) te tlangzarh bawkin, he hmalaknaah hian mipuite chuan Supreme Court-in thutlukna a siam tawh zawng zawng case, 36,308 te chu en let theihin a awm tih a tarlang.