Uttarakhand state assembly-ah UCC sawiho dawn

Uttarakhand finance minister, Prem Chand Aggarwal chuan February 5-8 inkarah Uttarakhand state assembly neih a nih tur thu sawiin, hei hi special assembly session a nih loh thu leh, nikum September 2023-a session tihtawp chhunzawmna tur a nih thu a sawi.

Finance minister chuan session-ah hian Uniform Civil Code (UCC) chu inthlan hmaa an tiam anga sawihoa pass ngei tum a nih thu a sawi.

Aggarwal hian tun ṭum session-ah hian state budget pharh a nih loh tur thu leh budget pharh hun atan chuan session dang neih leh a nih tur thu a sawi a, "February 5-a session neih turah hian state hran phuttute tana reservation siam chungchangte sawi a ni dawn a, committee-in report a peih hman chuan UCC chungchang sawiho a ni bawk ang", tiin a tarlang.

Uttarakhand-a rorel lai, BJP sorkar hian June 2022 khan committee dinin, he committee hi UCC hman leh kalpui dan tur chungchang zir chiang tura tih a ni. Committee hian report hi June 2023 khan an peih tawh nia sawiin, 2022 inthlana an tiam anga kalpui ngei an tum a ni.