Budget session hmain eptu MP-te hremna sût vek dawn

Parliament budget session chu vawiin aṭangin neih ṭan a ni dawn a, session ṭan hma hian eptu MP hrem zawng zawngte hremna chu sût vek a ni dawn tih parliamentary affairs minister Pralhad Joshi chuan a sawi.

Nimina chanchinthar lakhawmtute a kawmnaah, Joshi chuan, 'Lok Sabha Speaker leh Rajya Sabha Chairman te pawh ka be tawh a, sorkar aiawhin eptu MP-te suspend-na chu sût vek turin ka ngen a ni," tiin, anni pawhin rem an tih thu a sawi bawk.

Nikuma December 14 khan eptu MP 14 - Lok Sabha MP 13 leh Rajya Sabha MP pakhat chu Parliament security palzut a, rorel inkhawm lai tihbuai a nih chungchangah union home minister Amit Shah chu House-a thu sawi tura phutin, rorel inkhawm neih laia an aubuai avangin Parliament winter session neih mek aṭangin suspend an ni. Hemi hnu, December 18 khan eptu MP dang 78 ( Lok Sabha MP 33 leh Rajya Sabha 45) chu session neih mek aṭangin suspend an ni leh a, December 19-ah Lok Sabha-a eptu MP 49 suspend belh an ni leh bawk. December 20-ah Lok Sabha MP pahnih leh, December 21-ah MP dalng pathum suspend belh leh an ni. Nikum winter session neih laia eptu MP suspend hi 146 zet an tling a, an zinga 100 chu Lok Sabha MP niin, Rajya Sabha MP 46 an tel bawk a ni.

Nikuma Parliament winter session neih ṭum khan, December 13-a Lok Sabha rorel inkhawm neih laiin gallery aṭangin mi pahnih zuang lutin, dawhkhan hrang hrangah an tlan kualin auhla an chham a, thil khu kap chhuakin rorel an tibuai a ni. Hetianga buaina thlentu zinga pakhat hian BJP MP Pratap Simha hnen aṭangin visitor pass a nei a ni. He thil thleng chungchangah hian eptu leh rorellai member-te nasa taka inau buaiin, hun rei tak rorel mumal thei loin an awm. Eptute chuan Parliament security palzut a nih chungchangah hian union home minister Amit Shah chu thu sawi turin an phut a, House chhungah an aubuai avangin hrem a ni. Hetih lai hian Lok Sabha inkhawm tibuaitu zinga pakhat visitor pass petu, BJP MP erawh hrem a ni lo a, hei hian eptu member-te a ti lungawi lo hle.

Sorkarin all-party meeting ko

Sorkar laipui chuan tihdan phung pangngai angin, Parliament session ṭan hma ni, nimin khan all party meeting a ko.

Session neih dawn apiangin sorkar lai kaihhruaiin party hrang hrang hruaitute chuan meeting an neih ṭhin a, Parliament session neih tura an thil sawichhuah duhte tarlangin, sorkar lam pawhin a agenda neihte hrilh hriatna a nei ṭhin.

Nimina all-party meeting-ah hian sorkar lam aiawhin dfence minister leh Lok Sabha-a depouty leader Rajnath Singh, parliamentary affairs minister Pralhad joshi leh a deputy Arjun Ram Meghwal-te an tel. Congess aṭangin K Suresh, TMC hruaitu Sudip Bandopadhyay, DMK aṭangin TR Baalu, Shiv Sena hruaitu Rahul Shewale, Samajwadi Party aiawhin ST Hasan, JD(U) aṭangin Ram Nath Thakur leh TDP aiawh Jayadev Galla te an tel bawk.

February 1-ah interim budget pharh dawn

Kumina budget session hi January 31-February 9 chhung chauh neih a ni dawn a, Lok Sabha inthlanpui neih kum a nih avangin union finance minister Nirmala Sitharam pawhin February 1-ah intermin budget chauh a pharh dawn.

Lok Sabha inthlanpui hi April - May vela neih a nih rin a ni a, hei vang hian budget puitling hi July thla velah sorkar tharin a rawn pharh dawn thung a ni.

Finance Minister Sitharaman hian union budget a pharh ṭum rukna tur a ni dawn a, mahse tun ṭum hi interim budget a nih dawn avangin thil thlak danglam langsar, a bikin chhiah lak chungchangah a awm a rinawm loh.