Thubuai neitute sakhua leh hnam ziahlan loh tur - Supreme Court

Supreme Court chuan Thawhṭanni khan court zawng zawng leh registry hnenah hriattirna pein, thubuai an remnaa an tih ṭhin, thubuai neitute sakhua leh hnam ziahlan ṭhin chu ti tawhlo turin a ti.

Thupek hi Justice Hima Kohli leh Ahsanuddin Amanullah awmna bench chuan chhuahin, petition thehluttu sakhua leh caste ziahlan ṭhin chu thupek an chhuah aṭangin ziak lang tawhlo turin High Court leh a hnuaia court dang zawng zawng chu an hriattir. "Hetianga thubuai neitute sakhua leh caste ziahlan ṭhin hi a ṭulna kan hrelo, hetiang chin dan hi tun chinah chuan tih tawp tur a ni" tiin, tun chinah chuan thubuai thehluttu ten lo ziak lang pawh ni se court lam chuan an ziahlan ve a rem tawhlo a ni, tiin an sawi.

Supreme Court hian chhungkaw pakhat inneih thubuai an ngaihtuahnaa aṭangin thupek hi a chhuah a ni. An thubuai ngaihtuahah hian mipa leh hmeichhe hnam ziah lan a ni chu mak a tih thu a sawi a, thubuai neitute hian ziah lan a nih loh chuan registry-in a lo pawmloh ṭhin thu court hi a hrilh a ni.

Supreme Court chuan a thupek chu Bar member leh Registry zawng zawng ten an zawm theih nan, High Court zawng zawnga Registrar General-te chu hriattirna pechhuak turin a ti nghal bawk.