Kerala BJP hruaitu thattu mi 15-te thi turin an chungthu relsak

Kerala-a Alappuzha district court chuan Thawhlehni khan BJP hruaitu Ranjith Sreenivas thattu nia puh, mi 15 chu thiamloh chantirin thi turin an chungthu a rel. Mavelikara Additional Session court in thi tura an chhungthu a rel mi 15 te chu Naisam, Ajmal, Mohammed Aslam, Salam, Abdul Kalam, Saffaruddin, Manshad, Jaseeb Raja, Navas, Sameer, Nazir, Zakir Hussain, Shaji Poovathungal leh Shernas Ashraf te an ni a, Popular Front of India (PFI) leh Social Democratic Party of India (SDPI) mi leh sa te vek an ni.

BJP hruaitu Ranjith Sreenivas hi lawyer a nih bakah BJP state secretary a ni a, Kum 2021 December 19 khan a chenna inah a nupui leh a nu hmuh lai ngeiin rawng taka thah a ni. Sreenivas an thah chhan hi SDPI state secretary KS Shan thah a nih vanga phuba lakna ni ngeiin a ngaih theih, KS Shan hi Sreenivas thah a nih hma zanah RSS mi leh sa ni ngei a ngaihten an that a ni.