Budget session ṭan, MP thar lawm luhna hmang nghal

Parliament building thara budget session neih hmasak ber ni turin nimin khan budget session chu Lok Sabha leh Rajya Sabha joint sitting neiin ṭan a ni. Session ṭannaah hian President Droupadi Murmu chuan thu a sawi a, vawiin hian union finance minister, Nirmala Sitharaman chuan interim budget a pharh ang.

Joint sitting-a thu a sawiah, President chuan sorkarin Ram temple an sak puitlin thu te, criminal law thar siam a nih thu te, Jammu & Kashmir inhungna, article 370 ṭhiah thu te sawi langin, One rank, one pension hman a ni te, sipai bangte'n Rs. vbc. nuai khat an dawn thu te a sawi bawk a ni. President hian joint sitting-ah hian Hindi-in thu a sawi a, hei hi Vice-President, Jagdeep Dhankar chuan English-in a chhiar chhuak ve leh a ni.

President hian session ṭannaah hian Rajya Sabha MP thar lak luhna a nei bawk a, New Delhi aṭanga thlan tlin, Aam Admi Party (AAP)-a mi, Swati Mailwal chu Rajya Sabha MP atana lak luh a ni a, ani bakah hian President-in member a nominate theih aṭangin Chandigarh university founder chancellor, Satnam Singh Sandhu chu a tel bawk.

Budget session-ah hian Prime Minister Narendra Modi chuan tun ṭuma budget an pharh tur chu interim budget chauh a nih thu leh, budget pumpui chu sorkar thar a pian hunah an pharh chauh tur thu a sawi. "Inthlan a hnaih hi chuan sorkar hian interim budget chauh a pharh ṭhin a, he kal dan hi kan zawm ang a, sorkar thar siam a nih hunah budget pumpui pharh a ni ang" tiin a sawi.

PM Modi chuan Finance Minister-in budget session pharhnaa thusawi a neih hunah sorkar hawi lam tur erawh a hriat theih thuak tur thu tarlangin, tun ṭum session-a an sawi hmasak ber tur pawh hmeichhiate tana Lok Sabha leh assembly-a reservation siamna tur bill a nih thu a tarlang bawk. Budget session hi February 9 thleng neih tur a ni.