Construction-a thawk hmeichhiate maternity leave pe turin hriattir

Sorkar laipui chuan Thawhlehni khan thuchhuah siamin, construction lama hnathawkte hlawh chu digital payment-a kalpui leh, hmeichhiate chu kar 26 chhung paid maternity leave pe turin a ruaitute a hriattir.

Ministry of Road Transport and Highways (MoRTH) leh Housing and Urban Affairs te chuan an ministry hnuaia thawktu hrang hrangte zawm tura he thuchhuah hi siamin, an hnuaia agency-te chu hnathawk tura an rawih zingah hmeichhia, fa pahnih nei tawh tan kar 12, paid maternity leave pe ṭhin turin ruahmanna a siamsak. Hmeichhe naupai in nau an chhiat a nih chuan rai chhunga hamṭhatna an dawn tur, nau an chhiat aṭanga chhiara kar ruk chin thleng anga chhutin an dawng bawk tur a ni, tiin an tarlang.

Union Women and Child Development Minister Smriti Irani chuan,"Ram chhunga construction hrang hranga thawk hmeichhiate tana inkaihhruaina kan siamah hian anmahni ruaitute chuan raipuarte chu kar 26 chhung maternity leave an pe tur a ni tih a tel. Hei hi thil ropui tak a ni a, thu ziah mai ni loin, dan kengkawhtu officer-te pawhin heng hamṭhatna hi hmeichhiate'n an dawn ngei theih nan an endik fo tur a ni", tiin a sawi. Inkaihhruaina siam a nih takah chuan a ministry emaw, a kengkawhtu tur officer emaw tan pawh hmalak a awlsam tawh ang tiin a sawi bawk.

Thawhlehni khan ‘Women in workforce for Viksit Bharat’ hun hman a ni a, hetah hian Union Labour Ministry chuan hmeichhe tam zawk hnathawk tura an lo chhuah theih nana ruahmanna an siamte an tlangzarh. He hun hi Women and Child Development Ministry leh Labour Ministry te'n an buatsaih a ni.

Hnathawhna hmuna hmeichhia tam lam survey nei

Union Ministry of Labour & Employment leh Women & Child Development te ṭangkawp chuan hnathawhna hmuna hmeichhiate tel tam dan zir chianna an nei mek. He zir chianna an neih thu hi ‘Women in workforce for Viksit Bharat’ hmannaah Minister Smriti Irani chuan a puang.

Survey neih hi ram chhunga hnathawhna hmun hrang hranga hmeichhiate an tlem zel hlauhna avanga nei an nih thu leh, hnathawhna hmuna hmeichhiate tana hnathawhna boruak nuam a awm theih leh theih loh zir chianna a nih nghal thu a tarlang. International agency leh trade union hrang hrangte chuan ram chhunga hnathawhna hmuna hmeichhe awm zat a tlahniam chu ngaihven a ṭul hle nia an ngaih thute an lo sawi lang tawh a ni.

Hetih lai hian Labour Bureau in October 2023-a report a siam; Periodic Labour Force Survey (PLFS) hnuhnung berah chuan India ramah hmeichhe hnathawk hi an pung a, 2017-2018 inkarah 23.35% a nih laiin, 2023 report-ah hi chuan 37% a ni thung. He survey hi Union Labour Ministry-in Employees’ Provident Fund Organisation leh sorkar agency dang kaltlanga a neih a ni.