NEET PG exam fee tihniam

National Board of Examinations in Medical Sciences (NBEMS) chuan National Eligibility cum Entrance Test (NEET) Post Graduate exam fee chu candidate zawng zawng tan Rs. 750-a tihhniam a nih thu an sawi.

NBEMS chuan exam fee tihhniam chu kum tina NEET exam-te tana phurrit chhawkna a nih an beisei thu sawiin, exam fee tihhniam chuan huam bik a neih loh thu leh, eng category tan pawh Rs. 750-a tihhniam vek a nih thu an sawi. "January 1, 2024 hnu lama exam tura application theh lut zawng zawngte chuan exam fee tihhniamna ang vek hian an pe tawh ang," tiin an thuchhuahah an tarlang.

NEET PG exam fee tihhniam a nih avang hian kum 2013-a exam fee chawi aiin a tlem tawh zawk dawn a ni. Kum 2013-ah khan OBC leh general category te tan exam fee hi Rs. 3,750 niin, hei hi 2021 khan 4,250-ah tihsan a ni a, tunah hian Rs. 3,500-ah tihhniam a ni leh ta a ni. SC, ST leh PwD te tan NEET PG exam fee hi 2013-ah Rs. 2,750 niin, 2021 khan Rs. 3,250-ah tihsan a lo ni ve bawk. Tuna exam fee tihhniam hian SC, ST, leh PwD te tana exam fee chawi ngai chu Rs. 2,500-ah a tihniam leh ta a ni.