Punjab Assembly-in CAA duh lohna resolution pass ve leh

Punjab Assembly chuan nimin khan rorellai, Congress party in a put luh, Citizenship (Amendment) Act (CAA) ṭhiat tura phutna resolution chu a pass.  

Ni hnih awh, special assembly an neihnaa a ni hnihna, nimin khan state minister Brahm Mohindra chuan CAA duh lohna resolution hi a pulut a ni. Mohindra chuan, "CAA hian rampumah buaina a thlen a, hmun tam takah duh lohna lantirin nawrh huaihawt a ni. Punjab-ah ngei  pawh he dan siam thar duh lohna hi lantir a ni a, mahse nawrh  huaihawtnaah hian buaina chhuak awm loin boruak ṭha tak hnuaia neih a ni," a ti.

 

Kerala assembly chuan CAA duh lohna resolution hi a lo pass tawh bawk a, January 14 khan Supreme Court-ah Kerala sorkar chuan CAA khinna hi thehlutin, he dan hi Indian Constitution-in Right to Equality a pek kalh a ni, tiin a sawi. Petition hi Article 131 hnuaiah thehlutin, court hnenah hian CAA hian Article 14, 21 leh 25 a palzut avangin ram danpui kalh tia puang turin a ngen.