Union Finance Minister-in interim budget pharh

Union finance minister Nirmala Sitharaman chuan nimin khan 2024-2025 atana interim budget pharhin, inthlan hmaa Prime Minister Narendra Modi kaihhruai sorkar hnuaia budget pharh hnuhnun ber tur a ni.

Minister chuan he budget aṭang hian sorkar laipui chuan caste pali; mi rethei (garib), hmeichhia (mahilayen) leh ṭhalai (Yuva) te bakah, loneitute (annadata) ngaihpawimawh a nih thu sawiin, heng atan hian scheme chi hrang hrang ruahman a nih thu a tarlang.

Interim budget-ah hian Finance Minister hian Amit Kaal hnuaiah policy hrang hrang duan a nih thu tarlangin, awmze nei zawka India a ṭhan theih nan India khaw chhak lam huam chhung leh a chengte hmasawnna tur duan a ni dawn niin a sawi. Hei bakah hian PM Awas Yojana (Gramin) hnuaiah, in, vaibelchhe thum an sak tlin ṭep tawh thu leh, kum nga chhungin vaibelchhe hnih dang sak leh tum niin a sawi a, rooftop solar hmanga eng chhit man unit 300 chin a thlawna dawnna tur chu ram puma kalpui a nih tur thu a sawi bawk. Middle class chhungkuaa a phute tan mahni in leh lo an neih ve ngeina tur ruahmanna te, hospital awm sa tichangtlunga medical college tam zawk din belhna tur te, Aasha, Anganwadi-a thawk leh helper-a eizawngte tana Ayushmaan Bharat hnuaia an inenkawl senso tumsak te chu sorkar hmalakna tur atan budget-ah hian tarlan a ni.

Budget-ah hian PM Gati Shakti Yojana hnuaiah railway corridor pathum siam belhna tur dah a ni bawk a, hengte hi energy, mineral and cement corridor, port-connectivity corridor leh high traffic density corridor-te niin, tuipui ral aṭanga thil chah man tlawm leh rang zawk neihna tur a nih bakah, ram sum leh pai ṭhanna nasa takin a pui dawn niin Minister chuan a sawi.

Kum 2024-2025 atana sorkar laipui scheme zingah, Mahatma Gandhi National Rural Employment Guarantee Scheme (MGNREGS) tan Rs. vbc. 86,00 dah a ni a, Ayushman Bharat-PMJAY tan Rs. vbc. 7,500 dah a ni bawk. Thil siam leh thlai tharna lama incentive pekna atan Rs. vbc. 6,200 ruahman a ni a, solar power grid atan Rs. vbc. 8,500 leh National Green Hydrogen Mission atan Rs. vbc. 600 ruahman a ni bawk. Ministry angin Ministry of defence tan Rs. vbc. nuai 6.2 dah a ni a, hei hi tam berin, a dawtah hian Ministry of Road Transport & Highways niin, Rs. vbc. nuai 2.78 dah a ni ve bawk.