Jharkhand Chief Minister a bang, ED-in man nghal

Jharkhand chief minister Hemant Soren chuan Nilaini khan Governor, CP Radhakrishnan hnenah banna theh lutin a banna pawm a nih hnuah Enforcement Directorate (ED)-in an man zui nghal.

CM Soren hi dik lo taka ram pek chungchanga inhnamhnawihah puh niin vawi eng emaw zat ED hian inlan turin an hriattir tawh. January 20 khan ED hmaah hian inlanin, darkar sarih chuang thu zawh fiah ni mah se, inlan leh tura hriattir a ni. Nilaini khan ED hian Ranchi-a a chenna inah kal chilhin darkar sarih chuang thu an zawt fiah leh a, hemi hnu hian Soren hian Governor hnenah banna theh lutin, chief minister aṭanga a banna pawm a nih hnu hian ED-te hian an man ta a ni.

Man a nih chungchangah hian Soren hian Jharkhand High Court-ah thubuai a theh lut ve nghal a, ED-in Delhi-a a in an dap chu dan kalh a nih thu a sawi. Soren man a nih avang hian tribal pawl eng emaw zat chuan nimin khan bandh an huaihawt bawk.

Hemant Soren hi Jharkhand-a rorel lai, Jharkhand Mukti Morcha (JMM) party hruaitu a ni a, CM aṭanga a ban tak avang hian JMM hruaitu ve tho, Transport Minister ni lai, Champai Soren chu Legislature party leader atan thlan a ni a, chief minister atan lak luh a ni ang. Champai chuan,"Hemant Soren banna kan thlawp thu leh, sorkar siam thei kan nih thu Governor hnenah kan hriattir tawh a, tunah hian MLA 43 neiin pali hospital-ah an awm mek a ni. MLA 47 thlawpna kan nei a, Governor-in sorkarna siam tura min pawmpui hun chiah kan nghak a ni" tiin a sawi.