President-in 16th finance commission member turte pawm

President Droupadi Murmu chuan 16th finance commission chuan hna a thawh ṭan theih nan member thar ruatte a pawm thu a puang. 16th finance commission hi 15th finance commission term a zawh tak avangin, nikum December 31 khan din niin, chairman atan hian NITI Aayog vice chairman ni lai, Arvind Panagariya chu ruat a ni.

16th finance commission member atan hian sorkar laipui chuan full time member pathum leh part-time member pakhat ruat a nih thu a tarlang a, full time member-ah hian Department of expenditure-a special secretary hlui, Annie George Mathew bakah, Finance and Expenditure secretary hlui, Ajay Narayan Jha leh Artha Global executive director, Niranjan Rajadhyaksha te ruat an ni. Part-time member tur hian Soumya Kanti Ghosh ruat a ni bawk.

Finance commission hi kum nga chhung atana ram sum leh pai chet vel dan tura ruahmanna siamtu a ni a, central leh state inkara chhiah insem dan tur siam pawh an ruahman ṭhin. 16th finance commission rawtna hi sorkar laipuiin a pawm chuan April 2026 aṭanga hman ṭan tur a ni. 16th finance commission-in ruahmanna an neihte hi October 2025 thleng theh luh nan hun pek an ni a, hei hi 2026-2027 budget session-a pharh tur a ni.