Congress-in Agnipath-a tling zo lote tan Jai Jawan scheme tlangzarh

Congress party chuan armed force-a lak tura tling tawh, Agnipath scheme hman a nih tak avanga lak leh tak loh, mi 150,000 te'n rorelna dik an hmuh theih nan Jai Jawan scheme kalpui a nih tur thu an sawi.

Party hruaitu, Rahul Gandhi chuan Jai Jawan chu ṭhalai, rorelna dik lo avanga tuartute tana rorelna dik hmu tura auchhuahna tur a nih thu sawiin,"Jai Jawan hi chhawng thuma kalpui a ni ang. February 1 leh 28 hian hengho zawng zawng nena intawhkhawmna a awm ang a, March 5-10 inkarah ram chhunga martyr memorial zawng zawngah satyagraha kalpui lehin, March 17 leh 20 inkarah padayatra neih a ni leh ang," a ti.

Jai Jawan hi Congress hruaitu Rahul Gandhi-a'n West Bengal-a Bharat Jodo Nyay Yatra ni 18-na a hman mek laiin a tlangzarh a, Agnipath avanga sipaia tling, lak ni leh ta si lote chu Jai Jawan scheme kaltlang hian auchhuahpui a tum thu a sawi. Agnipath scheme kalpui a nih tak avang hian kum 2019 leh 2022 inkara Indian Army, Air Force leh Navy-a tling tawh, mi nuai khat leh singnga vel chu lak an ni leh ta lo a ni.

Congress hian AICC headquarter-ah press mite kawmin, Jai Jawan kalpui a nih chhan chu Agnipath scheme-in ram pum ṭhatna tur lam hawi aia ṭhalai nuai tam tak beiseina a tihbo an duh loh lantirna a nih thu an sawi. Congress Media and publicity department hotu, Pawan Khera chuan Agnipath hnuaia Agniveer-te tan hian hna a awm ngei dawn tih hriat a nih loh thu sawiin,"Sorkar laipui hian Agnipath scheme hnuaia selection test aṭang hian examination fee-ah ringawt Rs. vbc. 100 a dawng a, heng pawisa zawng zawng hi khawiah nge a kal tak tih hi Prime Minister hian sawi rawh se. Nge ni, eng emaw huaihawt nan an hmang zo leh tawh zawk?" a ti.