Uttarakhand sorkar hnenah UCC panel-in ruahmanna siam theh lut

Uttarakhand sorkarin Uniform Civil Code (UCC) zir chiang a, a hman dan tura ruahmanna siam tura a din, UCC panel chuan ruahmanna an siam tawh (draft) chu sorkar hnenah an theh lut.

UCC panel-ah hian member panga awmin, Supreme Court judge hlui, Ranjana Prakah Desai-a'n a kaihruai a, panel-in UCC draft an siam hi Zirtawpni khan chief minister Pushkar Singh Dhami hnenah an theh lut a ni. Uttarakhand hian February 5- 8 chhung hian, ni li awh assembly special session an ko a, he session-ah hian UCC chungchang hi pharh a, sawiho tur niin, pass ngei tum a ni. UCC hmanna tur hi an pass a nih chuan India rama UCC hmang hmasa ber state an ni ang. Mahse Assembly-a draft bill pharh a nih hma hian cabinet ṭhu khawmin an enho phawt dawn a ni.

He panel hi May 2022 khan din tawh niin, thla ruk chhung atan din a ni a, an hun hi ṭum li pawhsei tawh a ni. UCC draft buatsaih nan hian meeting vawi 60 neih niin, ziakin rawtna chi hrang hrang nuai 2 chuang an dawn bakah, mi 60,000 chuang an kawm bawk niin an sawi.

UCC hi khua leh tui zawng zawng, eng sakhua pawh huamin, inneih, inṭhen, ram leh thil neih bakah inrochun dan chungchanga dan pakhat leh inang tlang hmanna tur a ni. Pushkar Singh Dhami kaihhruai, Uttarakhand-a BJP sorkar hian inthlan hmain an state-a UCC hman hi an tiam a, UCC hi hman a nih chuan inthlan thutiam an tihhlawhtling thei dawn a ni. India ram state zingah chuan Goa hian UCC hi Portugese hunlai aṭang tawhin an hmang reng tawh a ni.