Governor-in Jharkhand CM thar tur ruat

Jharkhand governor, CP. Radhakrishnan chuan Jharkhand chief minister, Hemant Soren-a banna a pawm hnuah Jharkhand Mukti Morcha (JMM) Legislature Party leader atana thlan, Champai Soren-a'n sorkar siam tura an tlin thu a theh luh hnuah Jharkhand chief minister thar atan a ruat.

Jharkhand-a rorel lai, JMM hruaitu Hemant Soren hi Enforcement Directorate (ED) chuan Nilaini khan Prevention of Money Laundering Act (PMLA) hnuaiah manin, chief minister aṭang hian a bang zui a ni. Hemi hnu hian JMM party hian Champai Soren hi JMM legislature party leader atan thlangin, sorkar siam an duh leh majority an tlin thu hi Governor hnenah Ningani khan an thlen a, Governor hian Champai Soren hi chief minister atan ruatin, nimin khan lak luh a ni.

Assembly seat 81 awmna, Jharkhand-a sorkar siam tur hian MLA 41 neih a ngai a, JMM, Congress leh RJD-te ṭangho hian MLA 47 an nei a ni. Majority nei mah se, Governor-in Hemant Soren banna a pawm leh Champai Soren lak luh tura a pawm hun inkar rei lutuk avangin JMM lam hian an MLA te chu eptu lamin an laksak hlauin hotel pakhatah an dah khawm a ni.