India ramah Covid-19 vanga Thi mi 64,469 tling tawh
Ministry of Health and Family Welfare-in nimina report an tihchhuahah chuan hri kai hmuh chhuah thar ramchhung hmun hrang hrangah mi 78,512 an awm leh a, nimin piah lam report aiin hri kai hmuh chhuah thar hi tlemin a tlahniam ve a, heti chuang hian an la tam hle tho.
India ramah hian hri len ṭantirh aṭanga nimin thleng khan Covid-19 kai mi 36,21,245 an awm tawh a ni.
Darkar 24 chhungin dama puan mi 60,868 an awm leh a, hei nen hian hri kai dam leh tawh mi 27,74,801 lai an awm tawh. Mi 971 an thi leh tih tarlan a ni a, India ramah hian hripui vanga thi mi 64,469 an awm tawh a ni. Tunah hian hri kai mek 7,81,975 an la awm nia report a ni thung.
India rama hri kai tawh enkawl dam leh rate hi 76.61% a ni a, ministry chuan ni nga liam ta chhung khan mi nuai 5 chuang enkawl dam an nih thu an sawi. Hri vanga thi rate hi 1.79% a ni bawk.
ICMR Repprt
Indian Council of Medical Research (ICMR) chuan ni khatah sample 8,46,278 an endik tih nimina report an tihchhuahah an tarlang a, nimin thleng khan sample 4,23,07,914 an endik tawh a ni.
ICMR hian hripui endikna tur hian laboratory pawmpui 1,587 a nei tawh a, 1,004 chu sorkar laboratory niin 583 chu private laboratory a ni thung.