Central fund dawn loh avangin Mamata-i'n nawrh huaihawt

West Bengal chief minister, Mamata Banerjee chuan sorkar laipui chu state tana fund pe chhuak duh lo leh, titang luiah puhin, he thil duh loh lantir nan hian nimin aṭang khan nawrh a huaihawt.

Chief Minister Mamata hoin nimin chawhnu dar khat khan Maidan-a red road area-ah nawrh hi ṭan niin, amah hian a kaihruai a, Trinamool Congresss (TMC) party hruaitu eng emaw zatin an zui bawk a ni. Nawrh hi ni hnih chhung neih tum niin an tarlang.

West Bengal sorkar hian sorkar laipui chu West Bengal tana ruahman, Mahatma Gandhi National Rural Employment Guarantee Act (MGNREGA) hnuaia fund pe chhuak duh loah an puh a, hei hi nikum aṭang tawha pe chhuak tura West Bengal sorkarin an phut tawh a ni. MGNREGA fund pek phut hian TMC general secretary, Abhishek Banerjee chuan MP leh minister bakah MGNREGA hnuaia thawk eng emaw zat nen New Delhi-a Jantar Mantar-ah leh Kolkata-a Raj Bhavan kawtah te pung khawmin, lungawi lohna a lo lantir tawh bawk a ni.