SC-in advocate Prashan Bhushan Re 1 a chawi tir

Advocate Prashant Bhushan chu Chief Justice of India (CJI) nilai leh, CJI hlui parukte chungchanga a tweet dana court zahloa puhnaah Supreme Court chuan thiam loh chantirin, nimin khan cheng khat chawi turin a hriattir. 

Justice Arun Mishra kaihhruai, judge pathum awmna bench chuan an thutlukna siam hi puangin, "Media lama thu chhuah leh mimal ngaihdan tarlante chuan court thutlukna siam turah nghawng an nei lo," a ti. Hemi rual hian kum 2018 January thlaa SC judge pali-ten press conference an neih chu thil dik lo a nih thu sawiin, "Judge-te hi press conference buatsaih tur an ni lo," a ti. 

Bhusan hnenah a pawisa chawi tur, cheng khat chu September 15 hmaa pe turin a hriattir a, sum hi a chawi duh lo a nih chuan thla thum  chhung lungin tang bakah, kum thum chhung law practice thei loa hrem a nih tur thu hrilh a ni. 

Court-in sum chawi tura a tih hi a pawm thu Bushan chuan sawiin, a lawyer leh a thawhpui Rajiv Dhavan chuan a sum chawi tur hi a pe nghal tih a sawi.