President hlui Pranab Mukherjee a thi

India President hlui, Pranab Mukherjee chu nimin tlai khan kum 84 mi niin Delhi-ah a thi. 

Kumin August 10 khan Mukherjee hian a twitter-ah tunlai hripui leng mek, Covid-19 a kai thu a sawi. Hemi hnu hian Delhi-a Army's Research and Referral (R&R) hospital-ah dah luh niin a dinhmun hi a ṭha lo zui a, ventilor  hman tir a ngai zui a ni. August 13 khan hospital chuan President hi a thluaka clot awm zai a nih hnuah coma in a awm zui tih an sawi a, August 19  khan a chuap lamah infection a neih avangin a dinhmun hian tlakhniam lam a pan thu an sawi leh bawk. 

Nimin zing khan hospital chuan President hlui dinhmun hi a ṭha lo zual tih sawi lehin, doctor-ten theihtawp an chhuah chung pawhin a nunna an chhan thei ta lo tih sawiin, nimin tlai khan a fapa Abhijit Mukherjee chuan a pa thih thu hi a twitter-ah a puang a ni.  

Pranab Murkherjee hi kum 2012-2017 chhung khan  President a ni a, India ram President 13-na a ni. 

Indian National Congress (INC) hruaitu pawimawh tak niin, kum  2012-a President atana thlan a nih hma khan prime minister hlui Mammohan Singh kaihhruai UPA sorkarah ministry pawimawh tak tak a lo chelh tawh a ni. Kum 2019 khan President Ram Nath Kovind chuan India civil mi chawimawina sang ber, Bharat Ratna a hlan. 

Kum 2012, July thla khan Chief Justice of India chuan President atan a lalut a, Bengali zingah India President ni thei hmasa ber a ni. Kum 2017-a President thar thlanna neihah khan a kum upat leh hriselna dinhmun ṭhat tawk loh avangin a chuh zawm dawn loh thu a sawi a ni. 

Ram hruaitu hrang hrangten Pranab Mukherjee an ui thu an sawi nghal a, prime minister Narendra Modi chuan India-in a sun tak zet tih sawiin, ram hmasawnna atana hnuhma pawimawh tak tak a lo nei tawh a ni, a ti. Mi thiam, ram hmangaihtu dik tak a ni tiin, mipuite ngaihsan a ni, a ti. 

President Ram Nath Kovind pawhin president hlui a uina thu hi a twitter-ah sawiin, India ram fapa hlu ber zinga pakhat a ni a ti a; a chhungte leh ṭhiante, ram mipuite a tawrhpui thu a sawi.