Moscow-a India embassy-ah ISI mi nia hriat man

Uttar Pradesh police, Anti-Terrorist Squad (ATS)-te chuan Russia khawpui, Moscow-a India embassy-ah Pakistani intelligence agency, ISI mi nia hriat, India duhdan kalh zawnga chea puh chu an man.

ATS-te'n ISI enthlantu an man hi Satendra Siwal, Hapur district chhunga Shahmahiuddinpur khuaa cheng Jaiveer Singh fapa niin an sawi a, Siwal hi Ministry of External affaiQrs-ah thawkin, Moscow-a India embassy-ah a awm mek a ni.

Police-te sawi danin, India embassy-a ISI mi an man hian Pakistan hnenah India sorkar hnuaia Ministry of Defence, Ministry of External Affairs leh Indian military establishment-te thuruk pawimawh tak tak a lo pe ṭhin niin an tarlang. ATS-te hian thu an dawn ruk danin, Pakistan ISI-te chuan tute emaw kaltlangin, India thuruk petu tur, Ministry of external affairs-a thawkte chu pawisa hmanga an thlem thu an dawng a, hei hi ram pum himna atana pawi thei nia an hriat avangin an bawhzui nghal a ni. ATS-te thu bawhzuina kal zelah Siwal hi a chet dan enthla leh a sulhnu chhui niin, India dodal zawnga chetnaah a inrawlh tih hmuh chhuah a ni a, Meerut-a ATS field unit-a koh niin, thu zawh fiah a nih hnuah man a ni ta a ni.

Thu zawh fiah a nih lai hian chhanna mumal tak a pe thei lo a, hemi hnu hian a thil tihsualte a puang ta a ni. Siwal-a lakah hian IPC section 121A leh official secrets act, 1923 hnuaiahte FIR theh luh tawh a ni a, tunah hian Moscow-a India embassy-ah India Based Security Assistant (IBSA) angin a awm mek.