Ladakh mipuite'n state nihna pek phut

Ladakh khawpui, Leh-ah Inrinni khan total shut down kalpui a ni a, mipui eng emaw zat pung khawmin lungawi lohna an lantir. Pungkhawmte hian sorkar laipui chu constitution kaltlanga venhimna siamsak tura an duh thu leh, an hnam nihna leh an chenna environment humhim a, state nihna pek an phut thu an sawi.

Lungawi lohna punkhawm hi Leh Apex Body (LAB) leh Kargil Democratic Alliance (KDA) te huaihawt niin, Leh Apex Body member, Chering Dorjay Lakrook chuan,"Ladakh hmun tinah shut down hi an zawm ṭha a, China ramria awm leh Nubra valley-a chengte pawhin lungawi lohna lantir tur hian Leh an rawn pan khawm a ni. Kan thil phut palite kan hmuh ngei theih nan kan nawr zel ang," tiin a sawi. LAB hi Buddhist tam zawkte inzawm khawmna a ni a, KDA hi Shia Muslim-te aiawh an ni vek bawk. Heng pawl pahnihte ṭang dun hian Ladakh tana state phutna nawrh hi an huaihawt a, tribal status an neih theih nan leh hna laka reservation an neih theih nana India constitution sixth schedule-a Ladakh dah tel ve leh, Leh leh Largil tana parliamentary seat pakhat ve ve neih theih te an phut bawk.

Ladakh mipuite thil phut leh harsatna te ngaihtuah tur hian Union Ministry of Home Affairs (MHA) chuan high-powered committee a din tawh a, he committee hi Minister of State, Home changtu, Nityanand Rai chuan kaihruaiin February 9 hian meeting an nei leh dawn a ni. Committee hian Ladakh UT tan hian constitution kaltlanga venhimna pek leh mipuite thil phut ngaihtuah hi a lo tiam tawh bawk.

Sorkar laipuiin August 2019-a Jammu & Kashmir inhung bikna, article 370 a ṭhiah hnu khan Jammu & Kashmir state chu Union Territory pahnih, Jammu & Kashmir UT leh Ladakh UT-ah te ṭhen a ni a, state assembly nei loin an awm mek a ni.