Ladakh-ah intihbuaina a thleng leh

India leh China sipaite chu August 29 zan khan Ladakh-a Pangong chhim lamah an intibuai leh nia sawi a ni a, he hmunah hian China sipaite hian status quo thlak danglam an tum nia sawi a ni.

August 29 zan leh ni 30 khan China sipaite chuan ramri, Line of Actual Control (LAC) an pel a, khawihchet phal loh hmun status quo huam chin chu zauh an tum niin India sipai te chuan an sawi a, heng China sipai hmalak tumna te hi China ramri zauh duh vangah India chuan a puh bawk. 

Mahse buaina lian tham erawh a thleng lo niin media-te chuan an tarlang a, Chushul hmunah ram pahnih sipaite chuan brigade commander level flag meeting an nei thei a, inremna an siamzui niin India sipai lam chuan thuchhuah an siam. 

India leh China ramri, LAC hmunah hian buaina a chhuah fo avangin India chuan China thil tam tak a khapsak a, heng thil thleng ṭhin avang hian India leh China inkar pawh a chhe zual hle a ni.