SP leh Congress-in UP-a Lok Sabha seat chuh tur insem fel

Uttar Pardesh-a Samajwadi Party (SP) leh Congress chuan Lok Sabha inthlanpui lo awm tur atana Uttar Pradesh aṭanga seat awmte insem chungchangah inremna siam fel tawhin, UP aṭang hian Congress chuan Lok Sabha seat 11 an chuh dawn niin an tarlang.

Samajwadi Party general secretary, Ram Gopal Yadav chuan Congress nena inremna an neih tawh thu hi sawiin, SP chuan an candidate turte an puan thuai tur thu a sawi bawk. "Lok Sabha seat 16 atana candidate tur kan puang tawh a, seat dang atana candidate tur pawh kan la puang chhunzawm leh vat ang. Congress nena kan inremna hi thutlukna siam fel tawh a ni a, Congress tan seat 11 kan kian dawn a, INDIA hian UP-ah hian BJP hi a hneh ngei dawn a ni," a ti. UP-ah hian Lok Sabha seat 80 awmin, SP hian January 30 khan seat 16 atana an candidate tur an puang tawh a ni.