Budget session neih mekah PM Modi-a'n thu sawi

Parliament budget session neih mek chu a ni lina atan nimin khan chhunzawm niin, Prime Minister Narendra Modi chuan Lok Sabha-ah thu a sawi. PM Modi thusawi hunah hian President-in house address a neih pawmpuina hun hman a nih bakah, question hour neih a ni bawk.

Budget session ni lina ṭan a nih hma hian BJP chuan an MP zawng zawngte session-a tel vek turin Pathianni khan whip an chhuah. Nimina session-ah hian Lok Sabha-ah Public Examinations (Prevention of Unfair Means) Bill pharh a ni a, finance minister Nirmala Sitharaman-i'n Jammu & Kashmir tan interim budget a pharh bawk a, President-in house a address-na thusawi sawiho chhunzawm a ni bawk a ni.

Lok Sabha-ah hian Public Examinations (Prevention of Unfair Means) Bill hi union minister, Jitendra Singh chuan pharhin he bill hi competitive exam-a thil dik lo ti ṭhinte hremna tur chungchang niin, kum 10 lung in tantir leh Rs. vbc. khat chawitir thlenga hremna pekna tur a ni. Bill-ah hian exam chungchang ngaihtuahtu tur, high-level national technical committee dinna tur pawh rawt tel a ni bawk.

Question hour neih a nih laiin state tana fund dah chungchangah inhnialna a chhuak a, Opposition leader, Congress MP Adhir Ranjan Chowdhury chuan finance minister chu duhsak bik nei leh, Karnataka-ah pawh BJP sorkar a tlak hnuah fund an dawn tur hreksak an nih thu a sawi. Hemi chungchangah hian finance minister Sitharaman chuan state tana sum pek chu direct tax hmanga siam a nih thu leh, finance commisson rawtna anga kal an nih thu a tarlang.

Rajya Sabha-ah chuan chairman, Jagdeep Dhankar kaihhruaiin chawhma dar 11-ah session ṭan a ni. Union minister, Bhupendra Yadav chuan Water (Prevention and Control of Pollution) Act, 1974 siam ṭhatna tur, Water (Prevention and Control of Pollution) Amendment Bill, 2024 a pharh. Rajya Sabha chairman hian Rajya Sabha MP aṭanga suspend tawk, Delhi excise policy kaihhnawiha man, AAP MP, Sanjay Singh chu Rajya Sabha MP atana court-in lak luh phal mah se, privilege committee te ngaihtuah phawt turin MP atana lak luh a la phal lo thung.

Rajya Sabha-ah hian chawhnu dar 12-ah question hour hman a ni a, hetah hian CNG gas man chungchang te, Micro, Small and Medium Enterprises (MSME) dinhmun leh Red sea-a inbeihna avanga tuialhthei man sang thei chungchang te sawiho a ni.