Vur tla avangin Himachal Pradesh-ah kawngpui 475 a ping

Himachal Pradesh-ah vur tla nasa avangin kawng 475 chu a ping a, heng zingah hian national highway pawh a tel.

Thuchhuaha tarlan a nih danin, Himachal Pradesh-a Chamba-ah kawngpui 56, Kangra-ah kawngpui pakhat, Kinnaur-ah kawngpui paruk, Mandi-ah kawngpui 51 leh Shimla-ah kawngpui 133 vur tla avang hian a ping a ni.

Kawngpui a pin bakah hian kawlphetha pek chhuahna hmun 333 leh, tui pek chhuahna hmun 57 te chuan vur tla avang hian harsatna an tawk bawk niin State Disaster Management Authority chuan an tarlang. Inrinni liam ta khan vur tla avanga kawngpui ping hi tam zualin, kawngpui 504 bakah, national highway 4 a ping bawk a ni. Vur tla thenfai hna hi thawh mek zel niin Lahaul-Spiti-a police station pakuate chuan an sawi a, hetih lai hian vur erawh a la tlak belh zel a ni.

Lahaul-Spiti station pakuate chuan vur tla chu feet 1 aṭanga feet 5-a chhahte a nih thu an tarlang a, kawngpui hrang hrang dinhmun hi an pe chhuak reng bawk a ni. Heng station zingah hian Keylong, Kaza, Sumdo, Udaipur, Tindi, Koksar, Sissu, North Portal leh South Portal te an tel.

India hmar lam state hrang hrangah chhum zing nasa avanga harsatna an tawh laiin, Himachal Pradesh-ah erawh vur tla an buaipui thung a, kum thar hnuah Himachal Pradesh tlawhtu khualzin an pung nasa niin an sawi. Thuneitute chuan mipuite chu an chhuah hmain khaw chin ngaihven tur leh ngaichang zel tur in an hriattir a, ṭul tawpah lo chuan chhuak lo turin an hrilh bawk.