ISRO-in satellite a kapchhuak

Indian Space Research Organisation (ISRO) chuan nimin zingah khan hlawhtling takin van­sanga 'Geosynchronous Transfer Orbit' a dah tur, communication satellite GSAT-30 chu a kapchhuak. 

Nimin zing dar 2:35 khan South America, French territory-a Ariane Launch Complex (Kourou) hmun aṭangin GSAT-30 hi kahchhuah a ni. GSAT-30 Kg 3357-a rit a ni a, INSAT-4A spacecraft thlak tura tih a ni. Satellite GSAT-30 hian Geostationary orbit-a C-band kaltlangin Gulf ram, Asia leh Australia ram biakpawhna a tihchhak dawn bakah Geostationary orbit-a Ku-band kaltlangin India leh a thliarkarte inbiakpawhna a tichhak dawn bawk tih ISRO Chairman Dr K Sivan chuan a sawi.  

GSAT 30 hi kum 15 chhung hna thawk thei tura siam a ni a, communication satellite a nih angin satellite kaltlanga TV kan lo en ṭhin, Direct-to-home (DTH) tih­chhak zual nana siam a ni.