J&K-ah OBC tana reservation siamna tur pass

Sorkar laipui chuan budget session neih mekah Jammu & Kashmir (J&K) Union Territory-a panchayat leh municipality inthlana Other Backward Classes (OBC) te tana reservation siamna tur bill, Jammu and Kashmir Local Bodies Laws (Amendment) Bill, 2024 chu Lok Sabha-ah a pharh. Bill hi Minister of State for Home, Nityanand Rai chuan pharhin, Lok Sabha-ah hian pass a ni.

Bill sawihona hi nimin session-ah neih niin, constitution mila dan siamna tur a nih thu sorkar laipui chuan a tarlang. "Hemi hmang hian India zalen aṭanga kum 75 hnuah, J&K-a khua leh tui, OBC-te tan rorelna dik a awm thei dawn a ni," an ti. He bill hian J&K Panchayati Raj Act, 1989 te, J&K Municipal Act, 2000 leh J&K Municipal Corporation Act, 2000 te chu India constitution, part IX leh IXA te mil turin siam ṭhat a tum dawn a ni.

J&K-ah hian OBC tan panchayat leh municipality-ah reservation a awm lo a, reservation siam zat tur erawh Parliament-in a pass hnuah commission dinin a ngaihtuah chauh dawn a ni.

Hetih lai hian Anantnag MP, Hasain Masoodi chuan J&K inkaihhruaina tur bill Parliament-a sawiho a ni chu India rama thuneihna insem zai kalphung kalh a nih thu leh, Jammu and Kashmir Local Bodies Laws (Amendment) Bill, 2024 chu J&K assembly-a sawiho chi a nih zawk thu a sawi. Masoodi chuan sorkar laipui chu a rang lama J&K-a inthlan huaihawt vat zawk tur leh, article 370 ṭhiah chungchang pawh uluk zawka ngaihtuah ṭha leh tura a duh tawh thu a sawi bawk.