PM Modi-a'n Rozgar Mela hnunhnung ber tur hmang dawn

Prime Minister Narendra Modi chuan Lok Sabha inthlan hun tur puan a nih hmaa a hnuhnung ber atan February 12 hian sorkar hna lak runpui a hman ṭhin, Rozgar Mela hnuhnung ber a hmang dawn. Rozgar mela hman turah hian central sorkar office-a hna ruak hrang hrang hnawh khahna turin mi nuai khat la tura beisei a ni.

Department of Personnel and Training (DoPT) chuan July 2022 khan task force dinin, ministry dang panga; Defence, Home leh Railway pawh telin, an aiawh official pakhat ṭheuh an tel a, an ministry hnuaia post ruak awm leh, chung post ruak hnawh khat tura hma an lak dante report an pe ṭhin a ni. He task force hmalakna hmang hian Rozgar Mela kaltlangin, sorkar laipui hian hna lak runpui a kalpui ṭhin.

Rozgar Mela hi ṭum 11 hman a ni tawh a, a ṭum 12-na tur leh Lok Sabha inthlan hmaa a hnuhnung ber turah hian ṭum khata hna lak tam ber tur nia beisei a nih thu sorkar official-te chuan an sawi.

Kum 2022-a tlangzarh a nih tirh khan, Rozgar Mela kaltlang hian PM Modi hian mi nuai 10 tan hna pek a nih tur thu a lo sawi tawh a, tun ṭuma Rozgar mela kaltlang hian mi nuai khat tan hna pek a nih chuan bul ṭan a nih aṭanga chhiarin mi nuai riat tan hna pek hman a ni tihna a ni dawn a ni. Rozgar mela hmasa ber, October 22, 2022-ah khan mi 75,000 tan sorkar hna pek a ni a, neih a nih hnuhnun ber, November 30, 2023 khan mi 51,000 tan sorkar hna pek a ni bawk.