FSSAI pawmpuina chauh ngai turin ruahmanna siam

Sorkar laipui chuan food safety and standard regulations chu siam ṭhain, ei leh in tur lam chi siam dan phung leh a him leh him loh lam endikna kawnga pawmpuina pe theitu pakhat chauh awm tura ruahmanna siamin, he dan siam ṭhat hmang hian FSSAI chauh chu ei leh in tur atana certification pe chhuak thei a ni dawn a ni.

He dan siam ṭhat chungchangah hian thutlukna tawp siam a nih hmain Food Safety and Standards Authority of India (FSSAI) chuan danin a nghawng turte hnen aṭanga ngaihdan la turin draft notification a buatsaih phawt dawn a ni. Pawm a nih a, thu tawp siam a nih erawh chuan ei leh in tur chungchanga certification pek chhuah kawngah Bureau of Indian Standards (BIS) leh AGMARK te pawmpuina chu ngai tawh loin, FSSAI chauh hi a tawk tawh ang.

Health Ministry chuan FSSAI-in meeting vawi 43-na an neih thu leh, meeting-ah chuan ei leh in tur siamchhuah kawnga inkaihhruaina hrang hrang an siam ṭhat thu a tarlang. Inkaihhruaina siam ṭhatte hi pawm a nih a, thu tawp siam a nih chuan FSSAI pawmpuina chauh hi mamawh a nih tur thu leh, ei tur siamtute pawhin an thil siam pawmpuina hmu tura thuneitu hrang hrang hnena an kal a ngai tawh dawn lo niin an sawi.

FSSAI meeting hi union health secretary, Apurva Chandra chuan a kaihruai a ni. Meeting-ah hian ei tur siamchhuah tana FSSAI pawmpuina chauh tawk tura ruahmanna bakah thil dang eng emaw zat pawm a ni bawk a, mahse, heng dan siam ṭhatna tur an pawm zawng zawngte hi a nghawng turte lam aṭanga ngaihdan lakna draft notification an siam phawt hnuah thu tawp siam chauh tur a ni thung.