MP-a factory kangah mi paruk thi

Madhya Pradesh-a Harda district-a nimina halpuah siamna factory puak avanga kangmei chhuakah mi paruk an thi. Factory kang avang hian mi 60-in hliam an tuar bawk.

Hliam tuarte hi damdawiin-ah hruai nghal ni mah se, ṭhenkhat hi an hliam na deuh niin thuneitute chuan an sawi a, factory-a thil puak hi a nasat avangin khaw chhehvela awm, Narmadapram-a Saoni Malwa area-a chengte chuan an khua pawh a nghawr phak niin an sawi. Madhya Pradesh chief minister, Mohan Yadav chuan thil thlen dan kimchang hre tura official-te a biakpawh tawh thu a sawi a, kangmei chhuaka thi chhungte hnenah zangnadawmna, Rs. nuai 4 ṭheuh pek an nih tur thu leh, hliam tuarte chu a thlawna enkawl an nih tur thu a sawi.

District collector, Rishi Garg chuan National Disaster Response Force an koh luh tawh thu leh, chhanchhuahna hna an kalpui nghal thu a sawi a, kangmei chhuak ṭhelh tur leh thunun a nih vat theih nan, kangṭhelh motor pawh eng emaw zat tirh a nih tawh thu a sawi bawk. Factory-a hnathawk pakhat, kangmei chhuah hmaa helai hmun chhuahsan hman pakhat chuan, kangmei chhuah lai hian a hmunah mi 150 vel hnathawk in an awm mek niin a tarlang.