LS-ah Public Examinations (Prevention of Unfair Means) Bill pass

Lok Sabha-a budget session neih mekah, Thawhlehni khan sorkar hna lak exam hrang hranga thil dik lo ti man chhuahte hremna tur, Public Examinations (Prevention of Unfair Means) Bill, 2024 chu pass a ni.

He bill hmang hian sorkarin hnathawk tur lakna exam a buatsaih hrang hranga entawn emaw, thil dik lo dang ti man chhuah awm chu kum thum lung in tang tir leh, Rs. vbc khat thleng chawi tura hrem theih an ni dawn a ni. Bill pass a nih hnu hian union minister for personnel, Jitendra Singh chuan bill an pawm tak chu exam beitute tihhrehawmna tur ni loin, tute emaw, kalphung kalha chete dona tur a nih thu a sawi. "Hremna pek hi inven kan ngaihna laia vengtu a ni a, hei hi invenna kawng hmasa ber a ni," a ti. Singh chuan Artificial Intelligence (AI) technology ṭhang zel thlir chungin, he bill hmang hian muangchangin, hmanna lai bik awm ṭawng tam zawk hmanga exam pawh buatsaih tum a nih dawn thu a sawi bawk.

Hetih lai hian Congress MP, MK Vishnu Prasad chuan,"He bill hian hremna leh pawisa chawi tur chauh a sawi a, thil dik lo tih ṭhinte tihtlem dan tur erawh a sawi si lo. Zirlai chuan exam-naah eng vangin nge thil dik lo a tih duh tihte hi zir chian ngai thil a ni. Hremna pe turin ruahmanna in siam a, hna beiseite tan eng nge in tih ve thung?" tiin, Public Examinations (Prevention of Unfair Means) Bill, 2024 chu a sawisel thung. Eptu party MP hrang hrangte chuan sorkar hna nei tura inelna boruak sang tak karah zirlaite tan thil dik lo hmanga tlin mai duhna rilru a lian nasa tih sawiin, sorkar chuan zirlaite hremna aiin ṭanpuina tur kawng zawng zawk se an duh thu an sawi.