CPI(M) leh TMC-te'n ‘One Nation, One Election’ panel chairman hmu

Communist Party of India (Marxist) aiawh palai pathumte chuan One Nation, One Election chungchang zir chiang tura din, panel chairman, India president hlui Ram Nath Kovind chu hmuin, One Nation, One Election kalpui dan tur chungchanga ruahmanna awm leh an thlir dante an sawipui.

CPI(M) palai zingah hian general secretary, Sitaram Yechury a tel a, party central secretariat member, Muralidharan leh polit bureau member, Nilotpol Basu te an tel bawk. CPI(M) hian panel chairman, Kovind-a hnenah hian One Nation, One Election kaihhnawih thil pali an thlen. Yechury chuan an party-in ram pum a a ruala hun khata inthlan chu an dodal thu sawiin,"One Nation, One Election hman chuan rorel laite term pawhsei emaw pawh tawi a ngaih dawn avangin democracy kalphung a kalh a ni. Thuneihna insem zaina pawh a kalh a, hei hian regional party-te a nek chep thei a ni," tiin a sawi.

West Bengal-a rorel lai, Trinamool Congress (TMC) hruaitute pawhin One Nation, One Election panel chairman, Ram Nath Kovind hi hmu ve bawkin, ram puma a ruala inthlan an duhna phenah hian India ram chu mi pakhat lalna hnuaia hruai luh tumna a awm niin an sawi ve bawk. Panel chairman hmu tur hian Sudip Bandyopadhyay leh Kalyan Banerjee te an kal a ni.

Panel chairman an hmuh zawh hian thuchhuah siamin,"President hlui, Ram Nath Kovind hmuin, One Nation, One Election chungchang kan sawi a, TMC chuan kan dodal thu kan hrilh a ni. He ruahmanna phenah hian thil tum an nei a, chu chu India ram hi mi pakhat rorelna hnuaia dah tumna a ni. Tun hma chuan national party pahnih awm anga ngaih theih a ni a, tunah chuan reginal party tam tak an lo chhuak tawh, mipuite hian an rorel turin an duh an thlang thei a, hei hi danin min pek kan chanvo a ni. Regional party chuan rorelna siamin term laklawhah lo tlu si se, central-a sorkar hnuaiah inthlan leh hma chu an awm dawn tihna a ni, chutih hunah chuan mipui chanvo chu rahbeh a ni ang a, ram kalphung a pel tawh dawn a ni," tiin an tarlang.