India-ah Covid-19 kai mtd 27 chuang tawh

India rama Covid-19 kai hmuh chhuah chu nimin thleng khan mi 27,67,274 an tling tawh. 

Health ministry chuan Thawhlehni khan hri kai hmuh chhuah thar mi 64,531 awm lehin, hemi ni vek hian hri kai zinga mi 1,092 in an thihpui leh tih a sawi. Hemi hma hian ni khata hripui vanga mi 1,000 chuang thihna thlen hi ṭum li a lo awm tawh a ni.  India ramah Covid-19 vanga thi hi mi 52,889 an tling tawh. Thawhlehni vek han hri kai zinga  60,091 chu enkawl dam leh niin, ni khata hri kai dam tam ber ni a thleng. Hri kai dam tawh hi 20,37,870 an tling tawh a, recovery rate hi 73.18% a ni tawh a ni. 

Hri kai enkawl mek 6,76,514 an la awm. August 7 khan ram chhungah hri kai hmuh chhuah tawh mi maktaduai 20 an tling a, hemi aṭanga ni 17 chhungin hri kai hmuh belh hi  nuai sarih chuang an awm hman. India rama Covid-19 thihpui hmasa ber chu March 13-ah khan niin, July 17-ah he hri thihpui hi 25,000 an tling hman. Hemi aṭang thla khat a liam leh hnuah 27,000 an thih belh leh bawk. 

Hetih lai hian hripui thihpui, fatality rate hi a tlahniam zel tih ministry chuan sawiin, 1.92% a ni tih a sawi.