Loneitute'n Delhi panin kawng zawh

Noida leh Greater Noida-a loneitute chuan lungawi lohna lantir tumin Delhi panin kawng an zawh a, Delhi an thlen hmain venhimna hna thawktute'n an lo dang.

Loneitute hian chhan hrang hrang avanga lungawi lohna lantir tumin kawng zawh hi an huaihawt a, nimina Delhi pantu zingah Noida leh Greater Noida aṭanga loneitute an tel. Loneitute hian thla eng emaw zat chhung chu compensation sang zawk leh, tualchhunga thuneitute'n an ram an neihsak ṭhin chungchanga hmalak an lo phut tawh a ni.

Kawng zawh huaihawtah hian Delhi chhehvela state pathum; Haryana, Punjab leh Uttar Pradesh-a loneitute chu a bul tumtute an ni. Haryana leh Punjab-a loneitute hian Thawhlehni khan tractor march neih tur hi lo tarlang tawhin, MSP tiamna tur dan siam te, loneitute tana pension siam te, 2020-a an nawrh ṭuma loneitute laka FIR theh luh hnuhdawh te an phut.

Loneitute kawng zawh tum hi thuneitute lamin an hriat rualin Noida-ah chuan khawpui luh chhuahna dan vek a ni a, Haryana-ah pawh kawng zawh turte danna tur inpeih sa veka dah a ni. Noida chhunga lirthei zawng zawng chu dap vek an ni bawk. Loneitute'n Delhi an luh theih loh nan police bakah Rapid Action Force koh luh an ni a, drone hmangin khawpui dinhmun thlir reng a ni bawk.

Senior police officer, Shivhari Meena chuan Delhi leh Noida inrina zawng zawngah venhimna khauh taka kalpui a nih tawh thu sawiin, Delhi luh chhuahna kawngpui zawng zawng chu darkar 24 chhung dan a nih thu leh, lirthei lut tur reng reng an dap vek thu a sawi. Mi zawng zawngin harsatna an tawh lohna tura theihtawp an chhuah thu leh, loneitute nen pawh inbiakna an neih mek thu a tarlang bawk a ni.