Sorkar laipui buatsaih white paper beih nan Congress party-in black paper buatsaih ve leh

Prime minister Narendra Modi kaihhruai BJP sorkarin budget session neih mekah kum 10 chhunga an chetdan pho lanna leh, an hnathawhte tarlanna tura an buatsaih 'white paper' an tih beih let nan Congress chuan 'black paper' an buatsaih.

Congress-in black paper an buatsaih chungchang a sawinaah, party president Mallikarjun Kharge chuan,"Sorkar hian mi eng zatin nge sorkar hna hmu tih an sawi lo ang. MGNREGA sum an pek chhuah thu te a sawi zawk ang. State-ah pawh duhsak bik an nei a ni" tiin, sorkar laipuiin Jawaharlal Nehru leh Indira Gandhi an beihna chu a chhang let. Kharge chuan BJP sorkar chu rorel lai mek an nih angin thil man sang thunun turin eng hmalakna nge an neih tih a zawt.

Sorkar laipuiin sorkarna an chan aṭanga BJP-in hma a lak tawhna leh vawiin thlenga an dinhmun tarlang tura white paper an buatsaih, Parliament-a pharh a nih tur thu hi interim budget pharh a nih khan finance minister, Nirmala Sitharaman chuan a sawi. Finance minister hian white paper buatsaih a nih chhan chu sorkarna an siam hmaa central-a rorelna changtute'n thuneihna an hman sual dan tarlan nan a nih thu a sawi bawk.

Budget session neih mekah hian rorel leh eptu an inbei na leh hle a, President-in house address-na a neih sawihonaah pawh PM Modi hian Congress hruaitute chu beiin, BJP sorkar chuan engkim a siam ṭha angin a sawi a ni. Hetih lai hian Kharge chuan PM Modi chu eptu party hruaitute chauh beih nachang hriaah a puh thung."Modi hian ram dinhmun harsa tak leh rorelna dik lo nasa tak thleng mek sawi lang loin, dawt chauh a sawi zel a ni," a ti.