Uttarakhand assembly-in UCC bill pass

Uttarakhand assembly chuan special session an neih mekah Nilaini khan Uniform Civil Code (UCC) bill, 2024 an pass.

Chief minister Pushkar Singh Dhami chuan Uttarakhand state tan hun chhinchhiahtlak bik a nih thu sawiin, bill an pass tak chuan mi tin tan hamṭhatna a ken tel thu leh, sorkarna an siam hmaa an thutiam an hlen tak thu a sawi.

UCC hi hman theih tura puahchah nghal a ni a, hman ṭan a nih hunah chuan inngaizawng cheng dun turte chuan an chhungte hnen aṭangin phalna an neih a ngaih dawn bakah sorkarah registration an tih a ngai tawh dawn a ni. Kum tling lo nupui/pasal neih khap a nih dawn bakah, inṭhen chungchangah pawh dan inang vek hman tur a ni ang. UCC hnuaiah hian innei turin hmeichhia chu kum 18 a tlin a ngai a, mipa chu kum 21 a tlin a ngai bawk, hei hian eng sakhua leh hnam pawh a huam tel a ni. Inneih aṭanga kum khat chhung chu inṭhen tura dilna theh luh phal a ni lo bawk.

Uttarakhand-a UCC chungchang ngaihtuahtu, Wafq board chuan UCC chu Islam sakhaw kalh nia puhnaah thil nihna a nih loh thu leh, UCC dan zawm chu Islam dan tidanglamtu a nih loh avanga zawm a har loh thu a sawi.