Chhim lam state hruaitute'n Delhi-ah lungawi lohna lantir

India chhim lam state pathum; Karnataka, Kerala leh Tamil Nadu hruaituten nimin khan sorkar laipui chu fund pek chungchangah duhsak lo bik nia puhin, Delhi-ah lungawi lohna lantirin an pung khawm.

Sorkar laipui laka lungawi lohna hi Karnataka chuan a lantir hmasa ber a, chief minister Siddaramaiah leh deputy chief minister, Dk. Shivakumar te pawh Delhi-a Jantar Mantar-ah an kal a ni. State hruaitute hian central-a BJP sorkar chuan state-te tana fund pek chhuah tur an hup bet lui nia puhin, Shivakumar chuan Karnataka chu state zinga GST khawn ṭha ber dawttu an nih thu leh, ram tana sum la lut hnem ber pawl an nih thu a sawi. "Kan chanvo kan dil a, kan chanpual kan phut a ni. Tuilian avangin Karnataka sorkar chuan ṭanpuina kan dil a, engmah pek kan ni lo," tiin a tarlang.

Nimin khan Tamil Nadu leh Kerala MP-te chuan lungawi lohna lantir hi zawm ve lehin, sorkar laipuiin tax aṭanga sum hmuh state-te tana a sem leh ṭanpuina a pek kawngah a ti dik tawk loa an hriat thu an sawi ve bawk. Tamil Nadu MP leh rorel lai DMK thawhpui MP-te chu Delhi-a Mahatma Gandhi lim bulah an pung khawm a,hetih lai hian Kerala chief minister, Pinaryai Vijayan leh a sorkar hnuaia hruaitute chu Jantar Mantar-ah an kal khawm ve bawk.

Union finance minister Nirmala Sitharaman-i'n interim budget a pharh hnuah state ṭhenkhat chu sorkar laipui fund pek danah an lungawi lo a ni. Congress MP leh opposition leader, Adhir Ranjan Chowdhury chuan BJP sorkar chu state te tana fund pek kawngah, BJP rorel lohna state-te hrek leh, duhsak lo bikah a puh.