PM CARES fund donor zingah Chinese firm an tel leh tel loh Congress hruaituin zawt

Congress party senior leader leh union minister  hlui, P Chidambaram chuan ram chhunga hripui leng vanga sorkar laipuiin a siam, Prime Minister's Citizen Assistance and Relief in Emergency Situations (PM CARES) fund-a sum thawhtu zingah Chinese firm an tel leh tel loh a zawt. 

Chidambaram chuan PM CARES fund kalphung leh sum a dawn dan chungchangahte zawhna tam tak a awm thei tih a sawi. Kumin March thlaa He fund siam a nih aṭanga ni nga chhung leka cheng vaibelchhe 3,076 dawn a nih chungchangah, tute nge heng sum petute hi zawtin, an zingah hian Chinese firm an tel em tih a zawt. Congress hruaitu chuan April 1, 2020 hnu lama sum a dawn zat leh a thawhtute a zawtchiang bawk. 

Supreme Court chuan Thawhlehni khan PM CARES fund sum hi National Disaster Response Fund-a chhung lut tura ngenna thehluh chu a lo hnawlsak a, heng fund pahnihte hian siam chhan leh tum hran nei an ni, a ti. Hemi hnu hian Chidambaram chuan a twitter kaltlangin he fund chungchangah zawhna te hi a rawn siam a ni.