2025-ah India-ah Cancer vei nuai 15.7 awm ring

Indian Council of Medical Research (ICMR) leh National Centre for Disease Informatics and Research-in National Cancer Registry Programme Report 2020 report an tihchhuahah, India ramah cancer vei chu kumin chhung hian mi nuai 13.9 an awm a, kum 2025-ah chuan mi nuai 15.7-ah an pun chhoh rin a ni. 

Report-a cancer vei pun chhoh dan tura an chhut hi population based Cancer Registries 28 aṭanga an zirchianna leh hospital-based cancer registries 58 data aṭanga an chhut a ni. Vaihlo leh a kaihhnawih aṭanga cancer vei hi kumin chhunga cancer vei zawng zawng aṭanga 27.1% niin, mi nuai 3.7 vel an tling.

Mipa zinga cancer vei tam ber hi an pum, chuap, ka leh hrawk cancer an ni. Hmeichhe zinga cancer vei tam ber chu hnute cancer an ni a, chu chu cancer vei zawng zawng zinga 14.8% (nuai 2) an ni. Hmeichhe zinga chhul cancer vei hi mi  5.4%  an awm bawk. India rama mipa cancer tamna ber chu Aizawl district niin, mipa mi 1,00,000 zelah 269.4 in cancer an vei a ni. Hmeichhe cancer vei tamna ber chu Papumpare district niin hmeichhe 1,00,000 zingah 219.8 in cancer an vei a ni.