Vande Bharat Mission kaltlangin India mi nuai 10 chuang hruai haw tawh

Covid-19 vanga ram danga tangkhangte hruai tura sorkar laipui hmalakna, Vande Bhart Mission hmangin May 6 aṭang khan mi 10,98,000 chuang chu India ramah hruai haw an ni tawh tih Ministry of Civil Aviation a tarlang.

Ministry chuan mipuite thlawpna avangin ram danga tangkhangte hruai haw hna hi thawh thei chauh a ni tih sawiin, mipuite chungah lawmthu a sawi. Civil Aviation Minister Hardeep Singh Puri chuan sorkar laipuiin air bubble hmanga Australia, Italy, Japan, New Zealand, Nige­ria, Bahrain, Israel, Kenya, Philippines, Russia, Singa­pore, South Korea leh Thailand-a India mi awmte hruai haw an nih theih nan inbiakna neih pui mek a nih thu a sawi bawk. 

Heng ramte bakah hian air bubble hmangin Sri Lanka, Bangladesh, Afghanistan, Nepal leh Bhutan-a India mite pawh hruai haw zel tum a ni. Vande Bharat Mission kaltlang hian USA, UK, France, Germany, UAE, Qatar leh Maldives rama India mite chu hruai haw an ni tawh a, ramdang 13 aṭanga hruai haw hna hi thawh leh tum mek a ni.

August 14 khan External Affairs Minister chuan Vande Bharat Mission hnuaiah tun thla chhung hian international flight 500 thlawh tir tum a nih thu a lo sawi tawh bawk.