Lok Sabha-ah white paper pharh leh sawiho a ni

Sorkar laipui chuan Congress kaihhruai, UPA sorkarin an sorkar chhunga ram sum leh pai dinhmun an enkawl dan fel tawk lo nia an puhna tarlan nan leh, BJP kaihhruai NDA sorkara a danglamna leh ṭhat zawkna tarlang turin nimin khan budget session neih mekah white paper a pharh.

White paper hi union finance minister Nirmala Sitharaman chuan pharhin, UPA sorkar khan ram sum dinhmun ṭha pangngai tak chhawmin, kum 10 an sorkar chhungin hmasawn aiin tlakhniam lam an panpui niin a tarlang. White paper-ah hian Congress kaihhruai UPA sorkar dinhmun leh Narendra Modi kaihhruai sorkar khaikhinna chu tarlan ber a ni.

BJP buatsaih, White paper-ah hian Congresss chu sum leh pai enkawl thiam lo leh thuneihna hmang sual, an inthlahdah avanga ram sum leh pai dinhmunin a tawrh phah hialna dinhmun thlentu an nih thu an tarlang.

Congress-in 'white lie paper' tiin vuah sak

Nimina sorkar laipuiin BJP buatsaih, white paper a pharh chu Congress chuan dawt thu tarlanna, 'white lie paper' tiin a vuah sak.

Congres general secretary, Jairam Ramesh chuan sorkar 'white paper' ah chuan pawisa an tih thih a nih chungchang te, hna thawh nei lo pung zel te, thil man sang chak leh mipui dinhmun inthlau chak lutuk chungchang engmah sawilan a ni lo, a ti. White paper -ah hian China ramri dinhmun te, ramria buaina awm mekte hi an dah tur a ni a, hengte hi buatsaih turin kan ngen reng a, mahse an ngawi tlat tlung, a ti.

Congress party chuan hun rei tak tualchhung buaina thlen tawhna, Manipur chungchangah white paper buatsaih turin sorkar laipui hi a lo ngen reng tawh a, mahse sorkar chuan hei hi a bengkhawn duh lo a ni, tiin Ramesh chuan a sawi bawk.

Congress hian BJP white paper siam beih let nan hian black paper an buatsaih ve bawk a, black paper-ah hian PM Modi kaihhruaina hnuaia ram sum leh pai dinhmun tarlang ve bawkin, 'kum 10 chhung rorelna dik lo' tih an phuah a ni. Congress buatsaih black paper-ah hian Modi rorelna hnuaia ram chhunga khawsak man sang ta lutuk te, hnathawh nei lo pung te, zirna in thlak nasa lutuk te, rorelna in leh press mite khuahkhirh an nihnate tarlan a ni. Black paper hi phek 54-a chhah a nih thu Congress president Mallikarjun Kharge chuan sawiin, ram chhunga rorelna dik lo sawi dawn chuan tuialhthei man sang te, ni tin mamawh thil man sang te hi sawi ila, heng zawng zawng hi Modi sorkar hnuaia thleng a ni, tiin a sawi.