Sorkarin Bharat Ratna hlan turte a puan belh

Sorkar laipui chuan nimin khan Bharat Ratna hlan tur a puan belh. Nimina hming a puan belhte hi prime minister hlui -Chaudhary Charan Singh leh PV Narasimha Rao bakah, agriculture scientist MS Swaminathan te an ni.

Bharat Ratna hlan turte hi prime minister Narendra Modi chuan X-ah tarlangin, Charan Singh chu Indira Gandhi emergency puan dodaltu langsar tak leh a nun pum loneitute tana hlantu niin a sawi. Narasimha Rao pawh India ram tana economy hmel thar hawngtu, khawvel hmuha India phochhuaktu leh a hmalakna avanga vawiina India dinhmun hrang hrangte chu thleng thei a nih thu a sawi bawk. PM Modi hian agriculture scientist, MS Swaminathan chungchangah hian loneitute tana a thawh ropui tak leh thlai thar chungchanga ram tana a thawhhlawk em avanga chawimawina hlan a nih tur thu a sawi a ni.

Kumina Bharat Ratna hlan tur zingah mi panga hming tarlan a ni tawh a, tun ṭuma mi pathum hming tarlan bakah hian sorkar laipui hian socialist hruaitu lar; Karpoori Thakur leh deputy prime miniter hlui, LK Advani hming te chu Bharat Ratna hlan tur zingah hian a lo puang tawh a ni.