Uttarakhand-a madrasa vanga buaina chhuakah mi 2 thi

Uttarakhand-a Haldwani-ah Ningani khan phalna nei loa sak, mosque leh madrasa chu thuneitute'n ṭhiah an tum laiin buaina a chhuak a, he buaina chhuak vang hian mi pahnihin nunna an chan a, mi 250-in hliam an tuar.

Haldwani-a phalna nei loa sak mosque leh madrasa ṭhiat tur hian court-in thupek a chhuah a, ṭhiah tuma sorkar thuneitute leh police-te thawk chhuak chu Haldwani, Vanbhulpura-a chengte chuan tihchhiat hi phal loin an lo bei ta a ni.

Mipui lam hian thuneitute hi lungin an vawm a, police-te hian tear gas an hmang ve bawk. Hetih lai hian buaina hi sosang chhoin, police station kawta motor chu hal a ni bawk a ni. Buaina chhuak avang hian Haldwani-ah hian curfew puan a ni a, internet tihtawp a nih bakah police-te chu buaina thlentute kah phalna pek an ni .Hliam tuar 250 zingah hian police 50 an tel a, official ṭhenkhat leh journalist hliam tuar an awm bawk.

Superintendent of Police, Pralhad Meena chuan mosque leh madrasa ṭhiah tur chu court thu anga dan ang taka kalpui an nih thu leh, phalna nei loa building sak a nih avanga sorkar ram lak let tum mai an nih thu a sawi. Nainital district magistrate, Vandana Singh pawhin,"Police-te'n tumah an tibuai lo a, chuti chung chuan beih an tawk a ni. Police station beih a ni a, buaina siamtute hian station chhunga police halte an tum a ni," tiin a sawi ve bawk. Haldwani-ah hian mipui thinrim hian bike leh security bus 20 lai an hal a ni.

Buaina nasa zawk chhuak thei ven nan Haldwani-ah hian curfew puan a ni a, dawr leh sikul zawng zawng pawh khar vek a ni. Boruak a la rit hle a, chief minister Pushkar Singh Dhami chuan khawtlang tana hnawksak zawnga che te thianfai zung zung turin thuneitute a chah. Uttarakhand high court chuan Ningani vek khan mosque leh madrasa tihchhiat tura thuchhuah dodalna PIL a ngaihtuah a, mahse court hian mosque ṭhiatna tur hi titawp loin kaltlangpui a ni a, February 14 hian ngaihtuah ṭhat a ni leh ang.