Loneitute kawng zawh tur dan nan Haryana-ah internet titawp

Haryana police-te chuan an state paltlanga Punjab aṭanga Delhi pana loneitu kawng zawh tumte dan nan ramri an khar vek thu leh, phone internet tihtawp a nih thu an puang.

Thawhlehnia Delhi pana kawng zawh tum, loneitute hi Haryana sorkar chuan an state paltlangtir an tum loh thu sawiin, district pasarihah internet tihtawp a nih tawh thu leh, phone aṭang chuan call chauh hman theih tura thil an kalpui thu an tarlang. Phone internet hi Thawhlehni zan thleng hman theih a ni dawn lo a ni. Haryana-a Sonipat district-ah pawh sorkar hian petrol pump-te chu bottle leh container danga petrol pe lo tura hriattirin, tractor tan petrol litre 10 aia tam lak a phal lo bawk.

Police-te pui tur hian paramilitary force company 50 tirh luh an ni tawh a, Haryana police hotu, Shatrujeet Kapur chuan dan bawhchhia leh thu awih lo an awm a nih chuan na taka action lak an tum thu a sawi. State ṭhenawm aṭanga Haryana luhna tur kawngpui pawh dan niin, Haryana paltlang loa an kalna tur kawng ruahmanna an siam thung.

Loneitute nawrhna hi Samyukt Kisan Morcha (SKM) huaihawt niin, loneitute hian minimum support price (MSP) bituk nghet neihna tur dan siam an phut a, pension leh insurance scheme an neih theih nan sorkar nawr an tum a ni. Loneitute kawng zawhnaah hian pawl chi hrang hrang 200 chuang an tel a ni.