Damdawi-ina reels siam vangin doctor 38 hrem

Karnataka-a Gadag khawpuia sorkar enkawl medical college-a junior doctor 38 chu campus chhunga reels an siam avangin hrem an ni.

Gadag Institute of Medical Sciences thuneitute chuan heng junior doctor 38-te hrem nan hian ni 10 chhung practical training (housemanship)-a an kaltir tur thu an sawi.

Institution director, Dr. Basavaraj Bommanhalli chuan zirlaite chuan an tihpalh mah ni se thil pawi tak a nih thu a sawi a, 'Eng pawh lo ti duh se, campus pawna ti tur an ni a, damlote tana harsatna siam thei zawnga khawsak tur a ni lo' tiin, chutiang thil ti tura phalna an pek loh thu a tarlang.

Bommanhalli hian zirlaite chuan pre-graduation ceremony atan reels chu siam an nih thu an sawi niin a tarlang a, an thiltih avanga a ṭul anga an chunga action lak a nih thu leh, an housemanship kal lai chu ni 10-a an pawhseisak thu hi a sawi a ni.

Heng doctor zirlaiten reels an siamah hian damdawi-in corridor-ah an kuta scrub vuah chungin an lam a, reels dang lehah chuan damlo nawr kual a nih laiin report an lo en der bawk . An reels siam hi social media lamah darhin, mi tam tak chuan an hna ngaihthahah puhin an sawisel a ni.